Antologi Geguritan Kanthi Tema Sosial (2)

GEGURITAN 1

eSWe Sidi :

            AMPLOP, OH, AMPLOP

bangsamu iki bangsa kang luhur ing budi

wit kawuri jaman simbah, biyung, bibi

nora blereng bandha donya klawan gebyaring kuwasa

nora tepung mring amplop

dluwang tipis kang gandane wangur lan amis

mripatmu aja blereng  ndeleng amplop

kang isine enggal entek bareng karo anggonmu

 angop

aja titip nasib lumantar amplop

amplop iku barang palsu

katone kandel jebul isine mung saklungsu

aja kok titipke swara atimu lumantar amplop

jalaran ing dalan isine mung padha kanggo rebutan

nganti jegal-jegalan

antem-anteman, thuthukan,srekal-srekalan

amplop iku kebak wisa

nora becik kanggo ajuning bangsa

                                    Omah Gegutitan, 4 Oktober 2023

GEGURITAN 2

eSWe Sidi :

AJA CAKAR-CAKARAN

Cah bocah, aja cakar-cakaran

Rebutan apa, ta?

Rebutan permen, karet, apa watu dhakon?

Kabeh iku mung barang sepele, ora mingsra!

Tanpa guna

Delengen kae!

Bocah gedhe-gedhe padha cakar-cakaran sak geleme

Delengen kae!

Cah gedhe-gedhe padha cakar-cakaran esuk, awan, sore

Antem-anteman, thuthuk-thuthukan, gebug-gebugan

Wusana raine pating cloreng, pipi abuh, bathuk remuk

Mripate lamur, pikirane saya kuwur

Cah-Bocah, aja cakar-cakaran, ya!

Kene dolanan wae sluku-sluku bathok

Mripat  mlorok sinambi ndelok

Bocah-bocah gedhe pating plorok

Ning atine merem, tembung-tembunge gawe ati njarem

GEGURITAN 3

GEGURITAN 3

eSWe Sidi :

            AJA KENCENG-KENCENG

Samubarang lir, aja kenceng-kenceng

jalaran,  banjur tuwuh rasa ora seneng

merga kekencengen, pedhot senaring siter

tetembangan dadi ora pener

Senaring layangan, yen kekencengen uga putus

wusana bisa lampus.

Kekencengen ing rembug, sing maju malah gebug

samadya wae

kabeh padha penake                                  Omah Geguritan, Sewon 16220

GEGURITAN 4

eSWe Sidi :

              BANDHA AKEH KANGGO SAPA

awan bengi nyambut gawe

lali wayah ora eman ragane

sirah dienggo sikil, sikil dienggo sirah

linak lijo lingga lica

lali anak lali bojo lali tangga lali kanca

temahan bandhane tumumpuk ing kana-kana

lemah ginelar sumebar jembar-jembar

omah gedhong akeh magrong-magrong

mobil patang puluh kinclong-kinclong

asiling korupsi, arta negara dicolong

wong sugih lumrahe uripe kepenak

jebul jiwa ragane rusak

jiwa adoh saka Allah Kang Mahamulya

raga lemu ginuk-ginuk jebul kebak memala

 duwe tumpukan gula,

dhokter kandha  mung oleh ngombe banyu tawa

ing kulkas sumimpen daging iwak rasane enak

 mung oleh mangan sayuran sing gandane sengak

ing lumbung tumumpuk makental-kental beras

 kena dipangan ning mung saelas

Bandha akeh kanggo sapa?

                                                Omah Geguritan-Kowen Sewon, November 2021

GEGURITAN 5

eSWe Sidi :

BIYEN SAIKI

biyen,

 kowe duwe pangwasa

mula padha disubya-subya

tekamu diantu-antu pindha ratu

tuturmu digugu nadyan wagu tur saru

lakumu ditiru nadyan satemene saru

tur cetha yen kleru

saiki,

wus mrucut drajad pangkatmu

kanca-kanca wus ora maelu

centheng, ngaha, gali pengawalmu

 wus ninggalke sliramu

ragamu ringkih kabeh rambutmu putih

biyen sesebutanmu tangan wesi

saiki  tanganmu strok, alum merga hipertensi

dhuh…

awakmu banget ora ana aji

                        Omah Geguritan, 21-9-22

GEGURITAN 6

eSWe Sidi :

GAJAH-GAJAH ORA GENAH

Alas gung kebak gajah bambung

Nyrudug-nyrudug gedrug-gedrug

Nrejang palang, murang sarak nyingkiri bebener

Bumi kedher, horeg geger mawut-mawut

Marmut-marmut caos pemut nora diturut

Gajah-gajah saya ora genah

Midak rapah nrejang paugeraning Allah

Donya dadi bubrah

Gajah mung  bisa kalah

dening semut-semut kang sengkut

nyawiji ing ati, nyawiji ing karya

linambaran donga

mring hyang Widhi Wasa

OGK, 21 Desember 2018

GEGURITAN 7

eSWe Sidi :

GEGURITANE WONG GEMBLUNG

Donya iki panggung

ing panggung akeh wong gemblung

ngaku paham jane bingung

donya iki kebak wong gemblung

kakehan  omong, ing karya pengung

andremimil mumpluk tutuke

ngetokke tembung tanpa ana paedahe

mung ngrembug barang-barang sepele

barang wigati disepelekke

donya iki panggung

akeh wong gemblung jogedan sakarepe

sing gedhe melok gemblunge

sing cilik mung bisa nirokake

wedi yen  dianggep waras

mula, rewa-rewa ngatonke gemblunge

elinga, sak begja-begjane wong gemblung

isih begja wong bingung

sak begja-begjane wong bingung

isih begja wong kang tansah eling

mring enggoking lurung

                        Omah Geguritan Kowen-Sewon, 1-9-22

GEGURITAN 8

eSWe Sidi :

IKI POTRETMU

Iki potretmu(?)

Daksawang, dakgrayang gawe pikirku gonjang ganjing

gawe tangis ing atiku

 ngeres lan jempling-jempling

Potretmu kokpasang ing ngendi-endi papan

ing gedheg gardhu pinggir prapatan lan ing wit-witan

malah uga ing tembok kuburan.

Potretmu ngguyu-ngguyu mring kabeh wong mlaku

marakke seseg ing dhadhaku

jalaran mawa tulisan ing tengah dasimu :

Pilihen aku!

Ah, nangis kekejer atiku. Kowe katon wis dudu.

                        Omah Geguritan Kowen (OGK), Desember 2018

GEGURITAN 9

eSWe Sidi :

             KOTHAK 1

Mlebu kothak iku ora kepenak

sumpeg, buneg, gawe judheg

awak geter kepara ndredheg

kothak gawe winatesing srawung

kothak gawe uteg blong, suwung

kothak iku pager-pager kang ngadeg

jejeg, mbedenger

kothak mahanani kang suci dadi jember

kothak mahanani mripat mlorok nora ndelok

kothak gawe kuping budheg

kothak gawe manah ora genah

kothak kothak kothak kothak

kothak marakke sirah buthak!

                                    Omah Geguritan, 3 Oktober 2023

GEGURITAN 10

eSWe Sidi

            KOTHAK 2

Kothak kothak kothak kothak

Kothak iku dudu wewangunan

kothak iku wewangunan kang dudu

kothak iku kudu-kudu

kudu ngene kudu ngono

kudu padha aja beda

yen beda kaanggep dursila

yen beda dianggep memala

yen padha lagi kaanggep kanca

kothak iku ora guna

kothak gawe memala ing saindenge donya!

                                    Omah Geguritan, 3 Oktober 2023